Cerpen TAUN KUL

Oleh :Drs. Isma Tantawi, M.A.

Ama Nuin, uwetmi-uwet, lo nge sintak pejer. Surakni kedih nge bersesauten. Tukni kurik nge inger, ari uken urum toa. Beberu nge ku jingki munutu tepung, hehe nge lancuk kedik nge mugagak. Sitetue nge turun kaih, munangkak aih semiyang. Cayani rara nge terang, ari loyangni rering.

Emis dih kengon ilen matame nome. Lagu sigere ipikirkam, tulu lomi we gere reraya. Ulung peh gere ilen ara, dengke ngeke iyugerkam ku sinamat rantamma. Ike nguk iberri urum rom tangkuh mari reraya ini. Mane alas nge kujuelen, regee nge kubelin ken bajuni kekanakni. Oyapeh gere ilen genap, Nuin lah gere ilen demu.

Ikeni aku gere dalih ipikirkam. Sipenting ni kekanakni. Gere terengon kite kahe. Pongnge ku so kini tulak cerun berune rene berbaju ayu bersepatu jeroh. Gelam sawah waktue ini we kite nguk berketier, ari atu peh ipecah ari tutu peh iperah. Ku awanne ho peh ke betanang bang kite, gere bang mampat poen ries urum karing. Ike ku punne ike gere peh benemah, gere bang sanah-sanah. Nge betihe nasipte lagu kurik bagok arake ikeke ara ititok, kenal soboh pangan ken iyo, kenal iyo pangan ken soboh.

Naru dih ken sebukume, Ine Nuin, oyale katie nasipte gere mera mutetah. Kenge bang engonkam usaha sikubueten, ulu ken kiding, kiding ken ulu. Kusuen bako, meh panni kuntung. Kusuen lede, meh murecul. Kutos pola, meh panni telkah. Uripi itik, meh panni musang. Uripi kurik, meh pan kalang. Uripi kaming, emeh selapi kemang. Uripi koro, meh pan kule. Minah ku umah kurik ken behle, minah ku ume kalangne dagie. Besilo kite serahmi bang padih ku Tuhen.

Besilo anakni koro ara ilen taring, tapeh oya ke turah kite pikiri. Kerna Win lahni, taun arapho nge tamat sede (maksudnya SD). Win lah turah kite sekulahan, enti lagu abangnge, tirtu kite luahi. Ujungnge ari uken sawah ku duru ari ulu sawah ku kiding, ari atas sawah ku tuyuh turah kite pikiri. Win lah ini turah kite sapihi, kati nguk ken tungkelen, ken tunungen, ken tiwangan ni engie nge beriring, nge dabuh genap sara pasuken.

Mari semiyang ruhul, kucube kahe ku Uwe Tingkemme ho. Kadang ara ngguk iyuweten senne tikik. Karena we ben menjuel konyel urum uwe. Oya peh enti kite haraptu. Nihe peh kumpue nge senare anak ni matae, oyah mehne awannea simunangungnge. Karena Aman Teruille gere mera bebuet, lopeh terang beluh nekik urum jele, lo peh iyo kunul ijejunten ho. Hana we kene inen Nipak a. Kekanak a peh mehne dirus, idaten gere timang, iyungeren gere lurus.

“Tak kusi Kam male Ama Nuin” kene Ine sesire menganti lampingni anake baru berumur roa bulen.

“Semiyang soboh mule aku, mari oya eye memerah koro, kadang ara nusu, kati tos ken pepire, ken usok ni kukus” Ama peh beluh sesire menemengen uluh pemerahan i pumu kirie.

Kuyu beremus nge sejuk sawah ku tulen. Nami nge remberbe i ulungni kerpe nge sagupi emun. I pikiren ni Ama masih ipepengea cerakni Ine. Sebenare ike umah ayu gere male kutupang, ike cerak remang gere male ku dewe. Ari wasni ateni Ama. Tapi kerna nasip nge lagu ini. Bier ari atupeh ipecah ari tutupeh iperah. Ta ke rejeki gere ilen ara, kunehen ara nguk.

Atu telak ken semala. Kersik alus bersusun ken tempat semiyang. Gergam-gergum lingni gelumang. Terbangni manuk kedidi nge kuken ku toa, nemah basa lo peh nge terang. Pumu itatangan doa ibaca. Buge rejeki si gaib idekatan, ike sikucak ikulen, ike sikelabu iterangen, ike simusebu ituruhen. Amin !

Pumu iraupen ku salak, luh nge ner terasa porak. Atek macik nge mulei senang, pikiren bimang gere naeh karu. I wasni ate ibuleten tekat. Bergurilen teraruh i tanoh si rata, nyapunen kemel i ujungni saka. Ike gere demu pinyemen ari uwe Tingkemme ho ku kubotan bang mata kutulin bang kemiring male niro tulung ku Tuenho. Ciconi manuk urum kelikni kalang gere naeh ipikiri. Sipenting kekanakni urum reraya. Ike ara umur ke ara rejeki, puren ke betelah urum Awannea.

Uluh pemerahan itemeng, pintuni uwer iyuke. Ama mujem seserengge. Songomni koro nge taring tali. Sesire kedik, karu peh ara pora. Mari ini hanahmi we die sigeh ku rembege ini. Tali iluahan, koro ijulen, sesire bekekire kune we die akire. Anak dele ku dele, kul ku kul, naru ku naru. Tapi nasip gere ara ilen mera mutetah.

Sawah ku umah, uluh pemerahan seren ku rering, anak italui kati berkekede. Seba ku empus menjege kaming, seba i umah mengengkun engie. Si bijak awah tir musaut, siberat omol lagu segere pengea peh. Ateni ama Ine ken buah hati, bier ara dedondongkol urum tetingki, tetap iejer marahi urum imanat putenahi. Kati manis bercerak, kati manpat berperi. Kati bergune ku kuluh rege, bangsa urum agama. Kati enti ngulni tamun, kati enti ngucakni tengkah i wasni belang kampung.

“Ta ihi kuahne bun Ama Nuin?” Kene Ine sesire remalan ari dapur penjerangan.

“Ine Nuin gere nusu korone, songome taring tali” sesire netahni utem songkotan i dapaur penirun.

“Ta kadang songome ibuhkam tape pepoan, ta kenge emeh ipanganni pongngea”.

“Agakku male tos ken pepire, ken usokni kukus, ta ke gere nusu kunehen ara enguk. Soboh lang kadang lanihtu. Ike lagu taunne, pasate due puluh sembilen, kune metihhe taunni peh lagu noya”. Sesire meningoi capir mangan tuk kurik kelemne.

“Usok ilang padih tossen. Oyapeh sedep. Urum kekanakni si penting ara. Jema mude awahe sedep. Akupeh nango ulung mule sejep. Pien are ken lepat? Kati pane aku nukur deleni ulungge. Ike gere genap ken angon kahe miyen. Ike lebih temas we, nguk ken tumni duekali atau iosan ku ibieho, kerna Kaille sakit, sa mele nango ulung.”

“Ta kene kam male meminyem sen ku Uwe Tingkemmeho.”

“Oyale, mari semiyang ruhul kahe ke sempat kone. Rencanaku ike gere demu ari Uwe Tingkemmea, aku lepas ku awanneho, niro tulung. Ini peh ike kam setuju Ine Nuin.” Kene Ama luhhe remenang lagu simale mongot.

“Oyake teserah ku Ama Nuin. Ke mampatan kite meminyem ku awannea daripede ku jema laen. Ari muleami le male kungeren, tape aku takut Kam bengis Ama Nuin.” Ine peh sesire kedik.

“Kam Ine Nuin was pepien loni, lagu si anu dih le kengon”

“U… jergong!” Kene Ine sesire jem. Ine peh beluh, male nosah pakanni kurik, nge renggio i udukni umaha.

“Kini ulo yoh, ara male.” Kene Ama sesire memanang Ine. Ine peh beluh, unang-unang gere pengea italui Ama.

“Astagfirullahhalazim! Pasa rupen ini. Sunguh Ine Nuin gere kinget.”

“Nyebut-nyebut Ama Nuin.” Amapeh berkekonyelen uyem manak, kekemelen ilang salak.

“Awannea peh nge ara perinne ku aku, ike geriettu kenni Ama Nuin geh kumah. Kadang sen gere ara, ike rom ke nguk iosah” kene Ine sesire nenimang-nimang etek ucak, male mulei ilen munene.

“Aku beluhmi we keta, Ine Nuin.”

“Kuneh lo kam ulak?”

“Gih jen beluh peh ken nge nguneri ulak” kene Ama sesire jem.

“Ya, ningkam takekusi reye kekireme” Ine peh sesire nemenni anak ucake.

Ama peh beluh, harap gih semelah tuakal gih sengkeret. Ara we kire rejeki ari situju ini, sesire mununung aih membilangi atu, ku uken-ukenen, lagu senge musesenet lingni tansaran urum seset uten. Ulung nawal uncim gere ara telas, harapni ate tir we kire ulak. Kati nguk imungen urusen beleye.

Panang ku kuen, engon ku kiri. Ipenge lingni manuk tetekur bersesauten. Imo mentalu lagu si berpepongoten. Mutamah jauh jarak kekireni ama. Kunul i atasni atang, emeh mubayang usaha si enge ibueten gere munemah hasil. Mokot kunul pebening, sawah gere ken sanah pacat nge beriring i ujungni jejari. Rayoh nge ileng, nge mudedarahan.

Arup enti legih bek ukini kedih, arup enti gih ara bek ukini kera. Gih ara ulung uncim, ulungni awal keken peh gere mukunah. Dene irentas, rui itakai. Batang nawal itebang, ulung isusun. Ikot urum uyet-uyet, jujungen ku ulu. Langkah serapah, kiding museltu. Kona ku atu, munamah behle.

Tepi ni uten semiyang ruhul. Atasni atu kul bersemala kekuyang. Pumu itatang, doa isawahan. Buge Tuhen munosah jelen. Buge-buge karit menjadi lapang, gelap menjadi terang. Ilangkahan kiding, iberanin diri.

“Assalamualaikum!”

“Waalaikum salam warahmatullahhiwabarakatuh!” jeweb serentak ari wasni umah ni uwe Tingkemme. Ama peh masuk. Engonne konyel nge mutetumpuk, ara i duru, ara i atasni para.

“Ta ari hi Aman Nuin?”

“Ngenal ulung ari ukenne, ulung uncimpeh gere naeh ara.”

“Oya kati enti lanihtu berulung, ike sidekat nge emeh buh jema.”

Niet ni ate gere tersawahan, kerna siharapan nge mahat gere ara. I awah ikediken, ike i ate nge sawah mukaram runtuhe.

“Aku ulakmi we keta abang”

“Tasana keta ningko ini. Tummen lepat pesamma padih, kati enguk ken bebukeni ujangmue kahe.”

“Entimi gabuk, ke nge dekat reraya nge dele bebuke. Kukus nge tasak, due kali nge munge.” Ama peh mulangkah lagu sigere jejak ku bumi, gere tenes ku langit. Lagu jemur gere ber lo gantung gere ber tali. Sarami we ara harapan. Ike oya peh gere mubunge, gere beruah. Langkah ini nge kemel, nge kenyel. Sakitte gere sideh, kemelle gere ter perin. Lagu singuk peh mupancar padih ku langit, mutelnom padih ku bumi.

Remalan gere terasa, nge minter sawah ku umahni Awanne. Ama peh berpikir, kune die carae kati enti mukertuk ateni Awanne.

“Lanih dih ken Aman Nuin nango ulung?” kene Awan sesire munetahi uwerni kuro.

“Kelemne koro gerle, uwerre iruntakne, koro peh takuhi beluhne, engimu nge beluh ngenalie, ini nge ruhul gere ken ilen ulak” Awan sesire membasuh pumue ku aih wasni keltung bekasni koro, reye remalan male kunul berjejunten ku patal atas.

“Nume ari hi ko Aman Nuin?”

“Ngenal ulung Ama.”

“Inen Nuin urum kekanaka sehatke?”

“Sehat” pikirenni Ama bertamah karu, kune we die akhire puren. Ike kusawahan angan kasat cinteni ate ini.

“Ulungni hana kati gere mai ku atas, kahe icinggi kurik” Awan peh sesire naik ku atas den eye kunul dekat suyen ulu tiang, berseseren ku karung berisi oros ceruh, male ken kero reraya.

“Dengke ngeke iungeren ku sinamat rantamma”

“Oyale kati geh aku kini, kumpume gere ilen genap bajue, dengke peh gere ilen ara. Ike ara kemudahan Awanne, kami uweten mule senne tikik. Kerna lang Selasa, sempat ilen ibeli. Nge mari rerayani itetah carae. Rompeh nge nuling.” Cerakni Ama lagu simetus-metus, salake peh lagu sipesilu-silu, lagu negon matani lo murip.

“Ta side perlu Aman Nuin” Kene Empue sesire menggecep konyel, masle ken mangas, mari bebuke iyo kahe.

“Dele pora Ine, bedue puluh ribue.”

“Ta genap ke bek oya” kene Awan sesire menangkak sen ari songkoke.

“Bek ini peh nge kul tuah.” Wasni ateni Ama.

“Genap Ama” kene Ama sesire netahni pawake.

Ama peh ulak urum ate senang. Lagu singe renah bumi ijejak, lagu singe atas langit ijujung. Nge meh mubayang ku siremni anake, male reraya urum sebet rakan, dediang ku bur ku paluh, bertulak cerun, rune rene.

“Eh.. lagu sitirdih ken kam ngetem, lagu sigere nyak biese, Ama Nuin. Hana die makna?” Kene Ine sesire menggulung alas tempat mangan tuk korik kelemne.

“Oya kati Ningkam, bage geh ruh. Kunul kite iumah, ungerkam berat omol. Tir pora betetah, eye ungerkam sana die makna.” Ama peh sesire bercermin i rering pesantir.

“Gere inget kam ke serloni ke tigen (pekan). Cube miyen beketier, kadang ara rejeki iosah Tuhen.”

“Musim sana die besiloni Ama Nuin, emah peh kahe uwahni barik sana-sana.”

“Lagu tir dih le ken kam niro uwah-uwah, si emen kamma peh gere ilen murippeh iponne” kene Ama sesire kedik.

“Ume oya pakan nawar. Ta gere ke enguk naeh niro ku beden tubuhne.” Ine peh lagu sikemel kemuh, kemel ninea gere sunguh.

“Besiloni musim berkeroa. Oya kedie ikalei kam Ine Nuin?” Kene Ama sesire ngersat iselop iuduk ni pintu.

“Ike ara le ilen oya iwasni kekire me, oya aku gere naeh paham. Nasip peh nge ulu ken kiding, kiding ken ulu. Anak peh nge berayak, gere naeh inget peh seba geralle.” Ama urum Ine peh kunul urum-urum pebening.

“Ike gere naeh terging kam, ikersattan ku dedep dere ho.” Ine peh bengis, luhhe nge rembebe sesire memanang Ama.

“Oya berakah ku Ine Nuin. Musim bekeroa, ke ken pejebet. Ume ken urang kampung, lagu aku ini, Ine Nuin.”

“Ike mera peh jema ku Aku Ine Nuin, berarti we mubota urum mutuli.”

“Enti kam gunah, enti kam gerle. Hanya kam we ara i wasni ate putihku urum telege jernihku. Ku langit gere naeh mupucuk, ku bumi gere naeh mu uyet.” Ama peh lagu siteringet ku waktu mude pudahna.

“Ta beluhmi keta reye, enti kahe juah mata, enti kahe mubah kekire. Ingeti matani kekanakni”

“Ike beden tubuhku aha nge lagu guni waluh tem, ta ihi ulu ta ihi kiding.”

“Ike besiloni ruesku, mata nge mulei kabur, kulit nge mulei kenur, uk nge mulei campur, ipon nge mulei gugur.” Gere naeh lagu pudahna, kene Ine muningeti i masa we beru.” Untung Ama Nuinni ume pejebet atau ume de pe er (maksudnya DPR). Iwasni kekireni Ine.

“Ta hana ilen gere beluh?”

“Biasae ke male beluh gere lagu nini kam Ine Nuin.”

“Nyebut-nyebut… Pasa ini Ama Nuin.”

“Beseke. Astagfirullahhalazim.” Ama sesire remalan, memikiri lingni Ine Nuin.”

“Ama Nuin, enti gere inget kahe bajuni Uwin lahne.” Lagu agak musepak pora, lingni ine, kerna Ama nge ngaib pora.

“Bohmi.”

“Alhamdulillah, nikekanakni nge le genap.” I wasni ateni Ama. Kubelin bang kelabungni pake umahni sara. Penengonku kelabungnge nge lagu katir arung i kaming, tepi gere naeh mukejer, ujung gere naeh mujalin. Ike ara ilen kahe lebih, kubelin bang songkokku. Songkokku peh nge bulet lagu bebeke, warnae peh nge ilang, lagu perok uten.

“Assalamualaikum.” Kene Ama seserire menuke pintu. Jemni Ama peh gere naeh berulak. Nge lagu relas, wasni musim peruren. Ama peh kunul sesire menuke awis penemahan.

“Ini ningko Win, ini ningko Tek, ini nabangmu, ini nadikmu. Ini ningkam, ini naku.” Ama urum Ine peh kedik negon anake nge renggio, lagu tumpit lues belang, mukekamang mugenali rom lemboko.

“Nong hana turah ibeli Ama Nuin.” Kene ine sesire melipeti baju nge mugelase, lagu rom ilang nge imayoi koro.

“Ike ara senku, enti mule kelabung, bajume peh kubelin. Tapi besiloni kite tengah arat dih.” Kene Ama lagu si munyesali cerak berakah sobohne.

“Jem tujuh iyo, nge meling takbir, lagu sibersesauten uken urum toa, bur urum paluh, tene nge munge ulen pasa wasni taunni. Siberimen nge beroleh kemenangan. Sigere pasa nge geh penyesalan. Jem 3 kelem nge meling tamur, tene bersukur male niri tok kurik. Mercun iluah nge ketar ketur. Beru bujang nge turun kaih. Suluh itutung, canang iguel, hehe nge lancuk lagu sibergegantin.

Siberpemen ayu, niri ilulut. Giling oros nipulut, icampur urum bunge-bunge. Ibueten nume kerna perintah agama, kerna nge ara ari sitetue. Oya ken tene, laen umah laen alaman. Laen suku laen kebiesen. Sekeder ken tene setie berama ine.

Ulak semiang loha, alas ayu nge berdenang, bercurak genepo berlepih lebong. Amapeh kunul, Ine lembuku bersemah sujud. Niro maaf ke ara salah, kati luah denie akerat. Anak mununung bersalam-salaman. Kadang siberat salah tatang, kadang siringen salah layang, kadang buntul salah roroh, kadang lemah salah emah tanoh. ke ara cerak lepas, so aih deras ken penanute. Ike peri terayur, so tanoh gemur buh ken penyebue.

Ama-Ine mongot pesesinguk. Lagu jema male mah beru. Male minah aih aunen, male minah batang ruang urum gergel tete. Munengon anake, pane bersukur, pane berterime kasih ku Ama Inee. Anak peh beluh dediang ku uken ku toa, kubur ku paluh, ta sana sirai, ta sana si julen, ku so kini urum rakan-rakanne. Ama urum Ine peh nge pejem-jem. Ike delepeh alak nge musempur, gere naeh terasa. Kerna kekanakni nge bersenang ate (Sambungan).

“Kuneh lo kite beluh ku Awanneho?” Kene ine sesire ngacak i arapni cermin kolak pesantir i rering tepas. Bedak viva irabul ku salak, celak ikersat ku jangutni mata, lifstik isapu ku bibir. Nge lagu jamu ilang tetasaan.

“Oyake teserah ku kam.” Kene Ama sesire membaca buku masa ilel, i pumu kuenne.

“Kite nguk tir pora beluh, kerna i uken ni, Awan urum Empue gere naeh ara.” Kene Ama lagu simuninget ku masa lalue. Ama nge taringni Awan, waktu we berumur onom bulen iwas kanungen. Mari oya genap onom taun umurni Ama, Empu peh ulak ku Tuhen. Ama taring seserengnge, gere naeh berama, gere naeh berine. Ike gerahan musangka mungenali telege, ike mulape musangka ku ralik ni gelime.

“Nge ke munge kero tum Ine Nuin?”

“Nge tasak, tering num nemi we.”

Ine peh nge peh-poh. Merayul ulung urum mulie bengkuang. Pilih tape kucak ken tonni lepat, tape bebalun ken tonni kero tum. Besene le ate ni Ine male ulak ku batang ruang, male ulak ku gergel tete. Male munengon aih aunen, male mudemu urum rakan sebet. Santon iuke, tape ipilih, simampat belagie. Ike miselni jema jemen. Renah rembune, atas kul agih-agihe.

Kero tum nge munge. Kukus, lepat, due kali nge sige. Ama Ine nge uwet kunul. Lo nge dabuh geleng ruhul. Kekanakni gere ken ilen ulak. Oyale kati geralle peh kekanak. Kite mitet we nemak. Gere betihe si si si mule si si si puren.

“Ama Nuin, oya nge ulak kekanakne.”

“Nge ke semiyang ruhul?”

“Nge Ama.” Kene Uwin Ucak sesire minum ari mangkuk uluh. Win Lah lagu sigere bijaktu. Kadang ara padoke gih panal, kadang ara kelabue gih perseh. Hana die lamat, sana die makna. Lagu simutauh selibenne, matae murengeng ku engie. Karena sibenare Win Lah urum Uwin Ucak gere ilen semiyang. Mari oya, Win Lah urum Uwin Ucak, musangka ku tetajuren. Mari niri, eye semiyang ruhul.

Ara si taring ara si beluh. Kero tum iemen, siring itemeng. Ama-Ine beluh lagu ayu-ayu. Ine remalan termulo, Ama terpuren. Arup telas-telas iengon. Emeh sara lengkok, bese sara lengkokmi. Anak beriring seba termulo, seba terpuren. Seba bersesangkan ku arap ku uduk. Nge lagu gasing geratah ijening ku tanoh tekil. Gere ken sanah, nge minter sawah ku umah ni ralik. Kite nge petama, pintu nge beruke. Awan urum Empu nge penanti.

“Assalamualaikum!” Kene Ama sesire munetahni pawake urum songkok ayu, roa lo ilen ango ari tigen (pekan).

“Walaikum salam, katas-katas eye. Hana kati lanih dih ken sawah?” Kene Awan sesire nyeluken baju ayue, siben beli Empue.

“Win Kul, Win Lah, Win Ucak ne kusi beluhhe?” Kene awan lagu si mugeleng bang atea.

“Seba geh, seba gere. Porami ke sawah kahe.”Kene Ine sesire melekahan sengkolle. Kero tum emen ikuduk, anak ucak iemen arab. Nge lagu kedih beranak ucak.

“Ume le ko Aman Nuin urum Inen Nuin si kutangisi geh ku batang ruang ini, geh ku gergel tete ini. Aku denem ken kumpuku. Nge berbilang lo nge berbilang ulen Awan penanti. Nge peh sawah waktu, nge peh tenes ketike gere emeh imaiko kumpu.” Lagu sitangkuh miyen didong Nawan na i waktu masa bujangnge.

Urum ling keras Awan bercerak. Empu pebening, gere berani mosah peri.

“Ike tengahna ken kam kami denem. Ike besilonni kami denem ken kumpu.”

“Lang-suwai, ike reraya, enti silep, enti lupe. Imai emeh kumpue. Oya le makna nireraya. Kite berijin-ijinen.” Kene Awan, lagu si nosah ketebah Jemat.

“Waktu reya ini kite nguk meh mudemu. Kati meh ibetih kaum biak ni Ama urum kuluh rege ni Ine.” Kene Empu sesire menitok-nitok mangase.

Ama urum Ine kunul pebening. Nge lagu tungul was ni tamas ayu. Cerak ni Awan urum Empu gere naeh bersaut. Takut-taku salah jamut, kahe mepar miyen pungi musim peruren.

“Sentan kupikiri ternenang-nenang. Lagu sigere naeh sengeng ku kuen, gere naeh tiwel ku kiri. Cerakni Awan urum Empue.” Iwas ni pikir ni Ama.

Oya le makna, ike bercerak urum jema tue. Ike masih umur mude-mude, gere ilen sawah, gere ilen kona. Rupen dele, si gere muhuruf turah ibaca, si gere telas turah mu makna. Capan catur ni Awan, cali tera ni Empue, nguk ken payung iwas ni uren, nguk ken suluh iwasni tengah melem. Ku wasni rara gere mutelong, ku was ni aih gere remo, lagu adini didong bebujang jaman.