Oleh: Isma Tantawi
Mango
Kapur sara palit
Belo sara rilah
Pinang sara layang
Kacu sara tetir
Konyel sara gecep
Batil tembege
Bersapan ruje
Urum jejari si sepuluh
Sebelas urum kepala satu
Lengkap urum isin dirie
Ken tuker ganti
Ken rimel bedel
Ni rembege
Ku batang ruang ini
Ku gergel tete ini
Menyawahan denem urum mukale
Ken tene murip
Ari teluk ranto
Gaib ari ama ine
Jarak ari dengan urum sudere
tenah __________________ 1 __________________ isma tantawi
Canang
He… he……………uuu……………
Tang ting tong tang
Ting tong
Tang ting tong tang
Ting tong
Dung………………
He…he…………uuu…………
Tang ting tong tang
Ting tong
Tang ting tong tang
Ting tong
Dung………
He…he………………uuu……………
Tang ting tong tang
Ting tong
Tang ting tong tang
Ting tong
Dung………………
He…he………………uuu…………
Rata bewenne !
Ngeke sawah jamuku !
Aro……………*
He…he……………….uuu……………
* Aro = ara artie nge
tenah _____________ 2 ___________ isma tantawi
Tenah
Nge sawah ciconi manuk
Nge tenes kelikni kalang
Ciconi manuk i lahni belang
Kelikni kalang i kempong lah nume
Ciconi manuk selangkan terang
Kelikni kalang selangkan selese
Kite gaib bersidingen bur
Kite jarak berpentasan uten
Bier demu-demu i langit asapni rarate
Bier demu-demu i toa aih penirinte
Aih mu ulu
Arul mu kala
Ike keruh i ulu
Nge pasti tekal i kuala
tenah________________3_________________ isma tantawi
Mars Gayo Lues
TAWAR DEDINGIN SEJUK
So tanoh Gayo
Burmu mulintang bujur
Senuen ijo nge mucengkere
Uyem dele
Senet kekuyang
Aih mubentang
Oyale tanoh Gayo
Rf. Ciconi manuk cicempela
Nosah basah
Jerohmi kite murum
Sara tamun menetahi Gayo
Sudere, ama, ine
Etek beru uwin bujang
Urum-urum kite lagang
Enti naeh lale
Kite susun bang belo
Kati enti surang saring
Kite bacaran bang pora
Kati enti kite taring
tenah_____________ 4 _____________ isma tantawi
Rf. Sejukni tawar dedingin
Gelapni cermin
Kipesni upuh panyang
Ken tene sara ama ine
Uken urum toa
Enti naeh ken basa
Oyale denie te
Engon enye langkah
Tetah enye ketike
Tir kite uwet
Lanih kite nume
Kati dele enguk kite rike
tenah______________ 5 _____________ isma tantawi
KETUMER TERLIS
Itik rawan
Itik benen
Itik tue
Itik benengen
Kona ku poa masin
Kona ku lede jaing
Itik benengen
Ketumer terlis
Ume pakanni tengku aji
Ume pakanni sitetue
Ume pakanni kekanak maca
Ume pakanni pendekar
Itik benengen
Ketumer terlis
Ume pakanni umet………
Ume pakanni simengucep………
Itik benengen
Ketumer terlis
Pakanni setan
Urum
Pakanni jin serlut
Nge beluh itik
Nge geh iken pacak
Oya lagu gule urum manisen
tenah______________ 6 _____________ isma tantawi
IMO SENTEWAN
I tanoh sirata imo berketibung
I pucukni ramung imo berjunjanyi
Senangmi ko imo
Jerohen ningko padih heme
Imo taukmu makin gure
Umahmu tempatni kami berkekede
Imo ingetko sakit gule
Gere naeh ara tempat berkekede
Heme ko tengah isuket ku are
Heme ko tengah itimang kuneraca
Ike jeroh, heme paling mulie
Ike gere, heme tuyuhni imo
Heme iko ko male bahagie
Isuen ningkopeh jangutmu
Ume keredek pelin urum dagu
Mulei ari uku sawah ku siku
Kati dis urum aku (imo……)
tenah______________ 7 _____________ isma tantawi
MATE SESUK
Inih bereden
Bier kusi isuen
Muripe lemi
Inih mumata
Bier kusi isemen
Ulunge rebung
Uyete naru
Bak-bak lempaya
Pebuet perasa
Puket ujung purih
Pebuet perulih
Latah latuh
Sepah rasaduh……..
tenah______________ 8 _____________ isma tantawi
CATUR KULE
Kemuh gere tekipes
Sejuk gere tedaring
Bise gere terajah
Sakit gere tertebes
Kuyu gere terampis
Aih gere terpitet
Musim gere tertulak
Bier kul atau kucak
Kekanak enti ngeruhi aih
Tetue enti nguruki arul relem
Cube kunei ku aih sideras
Cube kunei ku kuyu sikeras
Cube kunei ku terangni ulen
Cube kunei ku cayani lo
Cube kunei ku gelumangni laut
Catur kule
Enti mai ku Gayo
Catur kule
Emah behle
tenah___________¬¬__ 9 _____________ isma tantawi
TENIRON EMPUNI TEMPAT
Ume koro si mutanuk narue
Ume ume si mutempeh kolake
Ume ines si naru ruesse
Ume pelu si dele tungkue
Tenironni iken
Entin naeh ara bum, racun, urum strum
Tenironni koro
Enti naeh ara siut urum telong
Tenironni manuk
Enti naeh ara senapan burung
Tenironni heme
Enti pacahi Gayo
Tenironni heme
Enti kunahi Gayo
Tenironni Gayo
Gayoi Gayo
Murip ikanung edet
Mate ikanung ukum
tenah_______________ 10 _____________ isma tantawi
REJEKI
Si halal opat:
Sara, kenal soboh pangan iyo
Roa, itiro ku heme
Tulu, iosah heme
Opat, terang i wasni hadis, jelas iwasni kalam
Si haram dele:
Kunei ku ate putih
Kunei ku tuen guru
Sidiki ku tengku
Iyuke kitep
Ibaca buku
Kati ara beda halal urum haram
tenah_______________ 11 _____________ isma tantawi
Sangkakala
Nge kukire ku rerangku si waluh
Nge kubilang ku jejariku si sepuluh
Nge kutulak urum kayu cabang
Nge rampat urum purih pitu
Nge kutangak-i ku langit
Gere naeh mutawar
Nge kutungku-i ku bumi
Gere naeh muuwak
Ketier nge ku kuen
Usaha nge ku kiri
Gere naeh musulih
Nge emeh bang umur kati mate
Nge emeh bang petemun kati cere
Halal kene ukum
Ikutuk ike ibueten
Kotek ipenge
Hejep ijeleni
Tapeh ari rapat
Nge jerohan musirang
tenah_______________ 12 _______________ isma tantawi
Uwes
Kungeren kul-kul i belang kampung
Kubetihmi le kire resam urum peraturen
Kungeren kul-kul i wasni teluk ranto
Kubetihmi le kire untung urum rugi-e
Kungeren kul-kul i wasni uten rime
Kubetihmi le kire tamas si misi kule-e
Kungeren kul-kul i wasni berawang
Kubetehmi le kire aih si misi beye-e
Singuk kungeren naru-naru i mata sirung
Singuk kukeberen kul-kul i bibir lebih
Tempatni sumpah tonni kelsih
Ike mulape, musangka ngenali ralikni gelime
Ike gerahan, musangka ngenali telege
Ejer marah ari ama, nge mugerawal buh jangkangku si kolak
Manat putenah ari ine, nge mutekar buh alihku si rantol
tenah__________________13__________________ isma tantawi
Terong Rebus
Bus terong rebus
Anak rengkeng
Ine kurus
Bus terong rebus
Anak rengkeng
Ine kurus
Sakit gih mu biak
Mah kero
Ken dediri
tenah________________ 14 ___________________ isma tantawi
Keber
Ike ara pengeko
Lingni seluit
Teneku sakit
I wasni ranto
Kirim nengi peh
Pepatini kuning
Uakni pening
Urum bise ulu
Kirim nengi peh
Belatah kelumit
Pembiyoni penyakit
Ari rembegeku
Ike ara engonko
Asap mukamul
Teneku kunul
I wasni ranto
tenah ________________ 15________________ isma tantawi
Lolo
Male kuawin
Terih aku muselpak
Male berlangkah
Lo peh nge iyo
Male kutauk
Gere sawah talu
Male kujangko
Gere sawah pumu
Male kujemur
Lo peh gere porak
Male kugantung
Tali peh gere ara
Minah ku umah
Kurik ken behle
Minah ku ume
Kalang ne dagie
tenah __________________16 ________________ isma tantawi
Uwin – Etek
Uwin-uwin
Entong koro ku belang durin
Takut aku ama
Kule ilo ilang mata
Etek-etek
Bebalun tape rebek
Beru berama
Bujang berine
Ike beru ken penomang
Ike bujang penaikni belo
tenah __________________17__________________ isma tantawi
Kuluh Rege
Sang : atas
Dungkang : tuyuh
Dangking : uken
Kelpat : toa
Tinyo : bur
Ogom : paluh
Titik : serapho
Lemeduk : serap ini
Depir : kuen kiri
Puluk : arap uduk
Kuluh rege
Gere tentu sara ama
Kaum biak
Gere mahat sara ine
tenah _____________________ 18________________ isma tantawi
Do’a Merajah
Kesa kauri
Kedue ketubun
Ketige tali puset
Keempat tembuni
Kelime roh
Keonom semangat
Ketujuh nyawa
Ko nge kubetih asal-usulmu
Anu geralni jema tuemu si rawan
Anu geralni jema tuemu si benen
Ko male kusuruh
Sekejep seketike
Gerlok ngko peh ateni polan
Kerna we dele dih mangan retani sudere
Aups……………mpitun
tenah __________________ 19 ________________ isma tantawi
Rolok Penayun
Pelis mulagang
Lenang munayu
Ajuk melepih
Ungel mulintem
Alas genepo
Bengkuang belak
Buh ken lepih lebong
Bengkuang sekit
Cucuk ken ampang
Alas tonne i santon
Tape tempani kirimen
Bebalun tempatni kero tum
Gedok tempatni penamatan
Karung ken pentuyuhen
tenah ___________________ 20 ________________ isma tantawi
Tenaring
Maman ilang
Maman ijo
Karena ara pudahna
Kati ara besilo
Beru berama
Bujang berine
Edet muturusen
Resam murembege
Langit tempat penangaan
Bumi tempat penungkuken
Sitangaki enti kire silen
Situngkuki enti kire cimo
tenah __________________ 21 __________________ isma tantawi
Janyi
Iwasni gelap ko kusuluhen
Iwasni porak ko kutudungen
Iwasni uren ko kupayungen
Beta peh rupen gere mujadi
Sana die salahku
Sana die dosaku
Kati pis atemu
Menaringen aku
Lagu sigere ara ko kusakiti
Lagu sigere ara ko ku lupen
Tubuhmu nge minah batang ruang
Rues mu nge minah gergel tete
Ijinen geralmu
Kutulis i was ni ateku
tenah __________________ 22__________________ isma tantawi
Behle
Aih mubeye
Uten mukule
Ari atas mera mutauh
Ari tuyuh mera mukerlop
Ume deret mucerah
Ume paya mulintah
Aras muceruk
Berawang mulembide
Kemaro kemuhen
Uren sejuken
Oya emehne
Kuasa ari Tuhen
tenah __________________ 23 _________________ isma tantawi
Gegoyong balu
Gegoyong balu
Ungeren jeroh, kulitmu item
Gegoyong balu
Ungeren kotek, bedenmu mujerelep
Gegoyong balu
Terbangmu nenang-nenang
Gegoyong balu
Umahmu i wasni loyang
Gegoyong balu
Ko nge musirang
Gegoyong balu
Pongmu nge merbang
Gegoyong balu
Nasipmu nge sayang
Gegoyong balu
Atemu bimang
Gegoyong balu
Cop ku cabang enti mulingek
Gegoyong balu
Cop ku ranting enti mulingang
tenah __________________ 24 _________________ isma tantawi
Mampat
Reduk lelungunen
Renah rembune
Atas kul
Agih-agihhe
Isipet kire enti narutu
Itimang kire enti berattu
Seta-e kire tetap ken penyipet
Are-a kire tetap ken penyuket
Tulukni are kire mahat opat kal
Tulukni seta kire mahat roa jengkal
Kati temas
Ike tingkis ulak ku bide
Ike sesat ulak ku dene
Ike pipet ulak ku asalle
tenah_____________________25_________________isma tantawi
Nasip
Ulu ken kiding
Kiding ken ulu
Kurik bagok
Ara ikeke ara ititok
Kenal soboh pangan ken iyo
Kenal iyo pangan ken soboh
Kadang depet
Kadang gere
Oyale akibat masa mude
Ike muripte sie-sie
Masa tue gere bahagi-e
tenah___________________26______________ isma tantawi
Amat-amatan
Murip ikanung edet
Mate ikanung ukum
Edet ari manusie
Ukum ( agama ) ari Tuhen
Salah ku edet
Kita berdolat
Salah ku ukum
Kite bertobat
Ini pakaianni heme
Kona porak gere melekang
Kona uren gere mulapuk
Nguk ken uakni atuk
Nguk ken tawarni rembege
tenah___________________ 27 __________________ isma tantawi
Saur
Mera ke die ijo
Seme si kutomang
Mera kedie senang
Karuni ateku
Ike dengan mongot
Mera we teduh
Ike dengan beluh
Kusi kuperahi
Ike aku denem
Kubaca suret
Ike aku ninget
Kuengon gamarmu
Ike kupikiri
Meran aku mongot
Tali si kuikot
Nge taring punce
tenah ___________________ 28 _________________ isma tantawi
Daling
Daling kolak ken seseren
Cabang gedok ken jejunten
Ike ongot gajah enti tetok daling
Gajah muraing
Serge ke jangutmu
Atu kul enti gegerak
Atu kucak enti isesimang
Si kul buh ken tupang
Si kucak buh ken kalang
Si berat mujadi ringen
Si gelap mujadi terang
Si karit mujadi lapang
Si sengeng mujadi timang
tenah __________________ 29 ________________isma tantawi
Pakat Jeroh
Langit sirung
Bumi jorok
Atu mugegergul
Tanoh gere rata
Ku bur menangkok
Ku paluh mengilih
Seba putih kena-e ilang
Seba layu kena-e kemang
Seba karu kena-e senang
Temas urum si jeroh
Lapang urum mupakat
Kati enti sirung ke perselisihen
Kati enti jorok ken pesirangen
tenah ___________________ 30 __________________ isma tantawi
Jeroh-jeroh
Lepas berule
Taring berai
Remalan terdene
Naik terkite
Kunul ter ruang
Beluh berunger
Ulak berkeber
Uren berpayung
Gelap bersuluh
Beluh berpong
tenah __________________ 31 _________________ isma tantawi
Timang
Suket mule ku are
Timang mule ku neraca
Ike gere pan aih
Enti irukah
Ike gere pan benang
Enti itarah
Ike arup saka
Enti eyat ku uku
Ike arup pegelangen
Enti eyat ku siku
Ike arup rongok
Enti eyat ku ulu
Enti kerat mulo
Kati isipet
Kati enti museltu
I tanoh si rata
Kati enti layu
Tetusuk wasni paya
tenah____________________32_________________isma tantawi
Ketier
Porak lo ken pikiren
Kekelem ken ingeten
Ari atu peh ipecah
Ari tutu peh iperah
Harap geh semelah
Tuakal gih sengkerat
Ku langit gere naeh mupenangaan
Ku bumi gere naeh mupenungkuen
Ara enti kul
Gere enti uwes
Si arae irupen
Sigere-e i tanguhen
Seba ari tubuhmu
Seba ari ruesku
Seba tik uken
Seba tik duru
Urum-urum memutus peri
tenah_________________33___________________isma tantawi
Pesemuren
Pesemuren i masa jaman
Tenasonni si tetue
Pesemuren i masa besilo
Gere naeh ara lagu pudahna
Pesemuren i masa jaman
Tempatni awas-awas
Pesemuren i masa besilo
Ken alat menolak bele
Pesemuren i masa besilo
Beseje iyuke-uke
Pesemuren i masa besilo
Iyuke menauhen rege
Pesemuren i masa besilo
Mera menjadi behle
Pesemuren i masa besilo
Masing-masing kite jege
tenah _________________ 34_________________isma tantawi
Kemali
Kemali gere nguk cecerak
Kemali gere nguk engon-engon
Kemali gere nguk pepenge
Kemali gere nguk amat-amat
Kemali gere nguk…………..
Lagu pepatahni jema jaman
Si berat enti tetatang
Si ringen enti lelayang
Si buntul enti reroroh
Si lemah enti emah tanoh
Pulang ara we kahe
Berat nge salah tatang
Ringen nge salah layang
Buntul nge salah emah tanoh
Lemah nge salah roroh
Lat batat rumput rating kayu atu
Muserah ku bagi we
tenah__________________ 35 _________________isma tantawi
Sonek
He tuak kukur
He kukur tuak
Pediangni kukur
I belang kolak
Penomenni kukur
I uluh minyak
Pejemurni kukur
I pasir kolak
Pemanganni kukur
I ampa berayak
He tuak kukur
He kukur tuak
tenah__________________ 36___________________isma tantawi
Salam Pemarin
Mokot nge aku taring penanti
Tapi besilo i taringko aku
Sumpah janyimu
Gere ku sesali
I tunung perintahni jema tuemu
Aku gih turut payu urum ruesmu
Kadang nge beta enong nasipku
Bunge si kusuen besilo nge layu
Gelah jerohmi ningko nasipmu
Bier aku manut ku toa
Salam pemarin ini kusawahan
Tene persilangan ko urum aku
( Sudah dikasetkan )
tenah__________________37___________________isma tantawi
Taringni Ama-Ine
Gere naeh berama
Gere naeh berine
Ku sahmi we di-e
Kukadun nasipku
Enge lagu seret
I atasni ulu
Enge lagu lelayang
Emus-emus kuyu
Kuseren ku kayu
Kayu peh murebah
Kuseren ku atu
Atu peh mupecah
Kutangaan ku langit
Luhku remenang
Kutungkuen ku bumi
Luh ku rembe
Gere naeh berama
Gere naeh berine
tenah ___________________ 38 ______________ isma tantawi
Sirem Manismu
Sirem manismu
Suntuk kuingeti
Mutamah budi, budi jerohmu
Nantin ko aku
Ho…….suntuk kuingeti
Enti taringko aku
Enti taringko aku
Aku beluh ku teluk ranto
Urum doa sempenahmu
Kutiro doa kutatangan pumu
Sawah kire cita-citaku
Kite akhire sawah mudemu
Lala nantinko aku
( Sudah dikasetkan )
tenah________________39_________________isma tantawi
Tanoh Gayo
Jeroh dih dene ku tanoh Gayo
Ara munangkok ara mungilih
I kuen-kiri bur mubentang
Dele senuen beweh mujadi
Oyale tempat tanoh asalku
Kuneh aku gere muninget
Aih aunen tempat bersene
I waktu kucak tempat bergegure
Kunehen aku gere le denem
Rakan sebet urum ama ine
Berganti taun nge ku taringen
Selohen die kite mudemu
Ulakmi-ulak kite ku kampung
Ku tanoh Gayo asalte
( Sudah dikasetkan )
tenah________________40________________isma tantawi
Ama Ineku
Sentan kingetmi ama urum ine
Aku itona kaih urum kume
Kiding ken ulu ulu ken kiding
Merah belenye
Kulni ate ken buah hati
Uren ken payung porak ken tudung
Menunung galakni ate jantung rasa
Buge bahagie
Naruni dene ini
Nge ku ralani
Gere ilen terbeles aku
Budi jerohmu
Kutatangan pumu ku tiro doa
Kuserahan ku Tuhen
Buge i lapangan
I alam baka o ama……ine……….ku.
tenah___________________41_________________isma tantawi
Salam
1. Em…………………………………………
Em……………lem an laho………………
Em……………lem an laho………………la hoya sarre…………
Lallah…………lem hahala………………la hoya hele …………
Lem hehele …… le enyan-enyan ho ……… lem an laho
2. Em………………………
Em………………………
Em…………uwe lesa
Uwe…………lesa
Uwe lesa alesalam a le alaikum
Sigenyan-nyan e lallah
tenah__________________42____________________isma tantawi
Sek
Pertama salam, kedue salam, ketige salam
Salam alaikum
Salam pertama ku empuni tempat
Buge kati selamat ingin sara ingin ini
Salam kedue ku Bapak gecik
We simendidik rakyat jelata
Salam ketige kupara penonton
Sigaib irai sidekat ingon
Salamni kami kadang gih emeh kona
Salam merdeka buh ken penutupe
tenah__________________43__________________isma tantawi
Uluni Lagu
1. Sayang birse……….milah
Sayang birse ……………milah
Nyan e ha e lallah
Kusurak pe le pemulen
Sarre…………lallah
Sare…………lallah
Lailah (haillallah)
Ehu…………………
Ehu…………………
2. Huhe le senden
Huhe le
Huhe le senden
Huhe le
Le enyan-enyan ho
Lem an laho
tenah___________________ 44 _________________isma tantawi
Saman
Grup grup pak grup
Grup grup pak grup
Grup grup pak grup
Grup grup pak grup
Gelah arih-arih kati selamat
Hana si karat buet lagu ni ni
Grup grup pak grup
Grup grup pak grup
Grup grup pak grup
Grup grup pak grup
Ado……gu…re…e…
Pemulen demu………
tenah _________________ 45 ______________ isma tantawi
Grup grup pak grup
Grup grup pak grup
Grup grup pak grup
Grup grup pak grup
Katas-katasan renye
Ulu i lengek ulu
Grup grup pak grup
Grup grup pak grup
Grup grup pak grup
Grup grup pakgrup
Ha……’e…………
tenah___________________46__________________isma tantawi
Jangin
01. Nge sawah ku tempat
Nge tenes ku ini
Gere muhali seli
Kami lahni dene
Gere muhali seli
Kami lahni dene
02. Asam kuyun renah-renah
Asam kedah lanyo-lanyo
Male kujangko gere sawah
Ara si renah tapas ku bumi
03. Nasipni kayu
Sigere beruah
Sara manuk peh
Geh mera singah
Sara manuk peh
Ger mera singah
04. Meldem cike rerayang
Meldem cike ketopang
Taring kite roante
Ranting ulungni kayu
Taring kite roante
Ranting ulungni kayu
05. Tajuk ulung nuluh
Tajuk ulung pinang
Ike gere senang
Berulak gembali 2 x
tenah _______________ 47 ________________ isma tantawi
06. Itabir ko peh
Nge gerakni gempa
Sana die sana
Sana die male
Sana die sana
Sana die male
07. Gih sanapeh ningko kemah
Gih muah kayu i toa
08. Wasni uten –uten
Tuyuh nulung kayu engi
Meling seset
Jauh dih pikirenku 2x
09. Daling seseren
Le enge murebah
Ate enti gunah
I rantoni jema
10. Sek kesek niu
Ko sedang munapi
Kire mu pelinmi
Kelumit terbange
Kire mupelinmi
Kelumit terbange
11. Seal laho hai ho
Si um hala
12. Masak ke ku kede
Gih narung Tepanyang
Masak ke ku Blang
Gih narung kota
tenah _______________ 48 ________________ isma tantawi
13. Ilangni kelele
Gih ku sangka masam
Ijoni rempelam
Gih ku sangka lungi
14. Ike kejang sana gere teduh
Ke mentunuh sana gere nume
Enti kase memadunen buet
Ta munupet ku jema si dele
15. Harapan bunge harapan
Harapan bunge ge layu
Harapan bunge harapan
Kuimanan gelumang muderu
16. Ke jeroh peh ko renggali
Nge lemi murip gih bersuen
Kejeroh peh tajuk dilem
Ku suen geh mera mujadi
17. Sana die sana
Sana die masuk
Sana die masuk
Seluk ku rembege
18. Kudenang ku denang i pematang
Terbayang-bayang aku engi
Kudenang ku denang i pematang
Terbayang terbayang aku engi
19. Dak diki kudinyon-dinyon
Dak diki kudinyon-dinyon
tenah _______________ 49 ________________ isma tantawi
20. He tuak kukur
He kukur tuak
21. Cak kerkum kaming nawe
Cak kerkum kaming nawe
22. Pien ne ipon emasmu
Tulu atas tuyuh roa
23. Bertimun-bertimun
I laut gelumang raya
Besemi-besemi
Sihen die nimang rasa
24. Tajuk ijo-ijo
Tajuk ijo-ijo
Tajuk ijo lemi
Tajuk ijo lemi
25. Ketemi ho ilang using
Tangkuh nuling kami rai
26. Sara ranting kering
Sara cabang layu
27. Enang-enang i ladang kami bun
Nguk bang lalun
Sesire ku paluh ni
28. Kemang bunge kemang
Gere ke nungeren sayang
Kemang bunge layu
Gere ke sayang atemu
tenah _______________ 50 ________________ isma tantawi
29. Dak we kene jingki
Ta kunehmi we kene niu
Payah kejang ne alakmu mamur
Ijangkatan jemur imai kujingki
30. Renda kawat ijamin ge…luntur
Teluk bayur ijamin ge…balo
31 Sarre salam alaikum
Sarre jamuni kami
32. Nah ningko tajuk ketemi
Ni kami sana osahko
33. Ulen isi batang ruang
Bintang isi gergel tete
34. Kalang niu turune peh beralih langkah
Gere jen sawah isamaran rejewali
35. Ilang beremeh
Kesebeh bete
36. Ini persalaman sebet rakan
Mulo ari kami 2 x
37. Denem peh ara mukale ngo mokot
Sentan muninget luh ku rembebe
Sentan muninget luh ku rembebe
38. Deneku naik nge sagupi emun
Deneku turun nge sagupi nami
tenah _______________ 51 ________________ isma tantawi
39. I atas ku rasi emun
Nge turun ku rasi nami 2 x
40. I tanoh si rata-rata
I tanoh si rata-rata
Imo berketibung Imo berketibung
I pucukni ramung-ramung
I pucukni ramung-ramung
Imo berjunjani imo berjunjani
41. Ilang using tajuk
Putih kuning bunge
42. Kepieso roa ikot
Amat orot kuen kiri
43. Sek sek niu dalih kami lingang
Kelumit terbang dalih kami mai
44. Selawit ara renggali Takengen
Ose lemule
Male kusuen i dudukni tenge
Kene atengku
45. Sarre siep mi siep
Sarre sige mi sige
46. I roda aku inampin
I mesin napin ko aku
I roda aku inampin
I mesin nampin ko aku
47. Jingki roda ne kidinge waluh
Jingki sunguh ne inyon kendiri
tenah _______________ 52 ________________ isma tantawi
48. Tuk kukur so nge temerbang
Ku nunang so kengon coppe
49. Kucincang alus-alus
Ku taka lumet-lumet
50. Pane dih ko menomang
Murentang parini seme
Pane dih ko menuling
Beriring parini raden
51. Karu-karu sedih atas ni pematang
Karu-karu seanag naku kekireku
Langit urum bumi simale musirang
Engi urum abang simale mudemu
52. Ros kemang bunge ros kemang
Ros kemang bunge setangke
0…o…bunge setangke
Sara ranting mulelingang
Sara cabang muleleno
tenah _______________ 53 ________________ isma tantawi
Tabini Didong
A : ……………………………………………………………………………………………
B : Bertirun ku rembege,
Berusihen ku si nge munge.
Kunulku nge tersesuk berdilem tajuk,
Sesukku nge terdiri bertajuk renggali, terjali tabi.
Tabimi le mule lengit si tentang ku jujung,
Seringkel payung kire tenes ku ruje jerake.
Maaf mi le mule bumi si kujejak,
Seringkel tapak kire tenes ku batu ampare.
Sesudah oyapeh we miyen,
Teringet tubuhku ken dewal-dewal opat,
Isie peh we mu isin si opat.
Saudere, urang tue, pegawe, pengulunte.
Saudere pong mupakat si sara umah,
Pongmu genap si sara belah.
Ike si naru ione le ikertan,
Ike si metus ione le isemeten.
Orang tue musidik sasat,
Ike si beluh isidikie,
Si taring isasatie,
Ke si guser itetapne.
tenah _________________ 54 _________________ isma tantawi
Sekali nge tetap iosahe doa sempenah, sempenah doa,
Geh kene katae,
Ke si buntul enti reroroh,
Ke si lemah enti emah tanoh,
Si cemak enti amat-amat,
Si kemali enti peperi,
Si ringen enti ilelayang,
Si berat enti itetatang.
Pulang ara we kahe,
Berat nge salah tatang,
Ringen nge salah layang,
Si cemak nge salah amat,
Si kemali nge salah peri.
Lat batat, rumput, ranting, kayu atu
Muserah ku bagi we,
Ike benne gih tentu ribue,
Ike ukum gih tentu taunne,
Kantur putih meja ijo,
Selangkan ken ton tempatte.
Pegawe muperlu sunet,
Si metih hadis urum firman,
Sah urum batal, makruh urum haramme.
Ike haram gih naeh makruh,
Ike berakah gerele sunguh.
Pengulunte musuket sipet,
Suket ku are gih naeh rancungen,
Timang ku neraca gih naeh alihen.
Tulukni are nge mahat opat kal,
Naruni seta nge mahat roa jengkal.
Are male ken penyuket,
Ike seta-e male ken penyipet.
Neraca male ken penimang,
Kati enti bang berat ku kuen,
Kati enti bang ringen ku kiri.
Lah dari pede oyapeh we minyem,
Ruesku teringet ken biak-biak si opat.
Kesani ralik, kedueni juelen,
Ketigeni sebe,t keopateni guru.
tenah _________________ 55 _________________ isma tantawi
Oyapeh we terang lapang,
Oyapeh we gelis selese.
Keni ralik mangan penjamu,
Juelen menjamui ye.
Ike beluh turah bertunung,
Ike taring turah berkedem.
Talu gih enguk bersepak,
Jurah gih enguk bertulak,
Jamut gih enguk bersintak,
Ralan gih enguk begerdak,
Cerak gih enguk sempelak,
Seliben gih enguk kerut,
Awah gih emguk cengengut.
Keni juelen ken kiding pantas,
Ken tulen tiger.
Ike mupucuk we le male mugetekne,
Ike mutampuk we male mumotekne,
Ike mukulit we male mungewekne,
Ike si matah we male munasakne.
Talu pantas musaut,
Jurah pantas mujamut.
Si bijak ken perawah,
Si teger ken penemah.
Si bijak kiding beroleh saka,
Si bijak awah beroleh kata.
Ike ni sebet ramah-ramah i tali arus,
Mutekus i jelen raya.
Entapni rokok sisara puting,
Aih si sara tenting,
Bako si sara gising,
Sunguh sinting jadi sara ine ama.
Sara sakit, roanne bisen,
Sara nuing, roanne man manisen.
Sinte murip bersikeberen,
Sinte mate bersientongen.
Ke ni gurute tempatni oros si senare,
Sensim sara, jarum pitu, ineni kuning bek uku.
Jarum pitu-e peh terbagi due,
Tulu ku murid opat ku guru.
Si ku murid-e ken pelampong ni kuyu si keras,
Ken ampis ni aih si deras.
Buge ipitet enti naeh nitis,
Iampis enti naeh murece.
Si kuguru-e peh ken penejemni doa,
Pengabulni ilmu si osahe ku bagi kite.
tenah _________________ 56 _____________ isma tantawi
Sesudah oya peh teringet we miyen,
Ken ruang-ruang si tig.e
Kesani pendehren,
Kedueni pendahrin,
Ketigeni kekasihen.
Keni pendehren,
Si gaib dang-dang deka,t
Si dekat dang-dang mupakat,
Si mukulit i one le i kelean,
Si mutampuk i one le ipoteen,
Si matah i one le itasaan.
Ke ni pendahrin,
Tempat ni pecah belah,
Mangkuk kuren,
Senuk legen,
Capir belenge.
Ke ni kekasihen istanani reje,
Bube sesat ulak ku dene,
Tingkis ulak ku bide.
Oyale bidete iyon si sara iyon ini,
Ingin si sara ingin ini.
Padok gih panal, i one le ipanalan,
Kelabu gih perseh, i one le ipersehan.
tenah _________________ 57 _____________ isma tantawi
Sesudah oyapeh teringet we miyen ruesku
Ken katani maas, maaf, ampun, tabi.
Ampunmi ama si sawah kutauk,
Maaf mi ine si tenes kutalu.
Kesawah kutauk kutauki,
Ketenes kutalu kutalui.
Ke gere sawah kutauk,
Si gere tenes kutalu.
Kutatangan jejariku si sepuluh,
Sebelas urum kepala satu.
Pitun ku atas, pitun ku tuyuh,
Pitun ku kuen, piton ku kiri.
Ken gantini batil tembege,
Bersapan ruje,
Lengkap urum isin diri-e.
Kati kutiro ke maaf,
Kerna ruesku male bercapancatur.
Kati kutiro ke tabi,
Kerna tubuhku male bercalitera.
Kadang ara le kase capancaturku,
Gere temas ipenge kemiring.
Kadang ara le kase caliteraku,
Sigere remang ipanang mata.
Ujungni didong pemulenku…… cube ……
A : …………………………………………………………………
B : Luah miko sinte geh kene kata-e
Abang rejeku ke die kenaku
Kutiro bang alihmu si sara alih
Kutiro langkahmu si sara langkah
tenah _________________ 58 _____________ isma tantawi
Abang rejeku beralihmi bang kite
Kulangkahan urum kuen,
Kati ringen ku tunungen urum kiding kiri.
Ku ujung urum ku ralik,
I atas papan ini.
Besilo kutiro miyen tabi,
Seger beli, sebelit segermi.
Tabimi lemule papan si tersingkih,
Nge teralang male kugeridik,
Ku ujung urum ku ralik.
Tabimi lemulo alas si tergulung,
Si enge terdenang.
Kadang ara bengkuang metus,
Maaf sisip langus urum empuni nayu.
Kadang ara alas si kona ulih,
Cucur ken waih tapis ken pumu.
Kati enti nyumpah serapah empuni nayu,
Agakmu temas ke nangkak bengkuang,
Kiding murawit pumu muruyang.
Agakmu temas ke mulangus,
Jejari tirus tempapak ilang.
Tabimi lemulo upoh si terlipet,
Nge terkemang.
Male kusame ku kuen,
Male kusame ku kiri.
Kadang ara le kahe,
Ken maluni mata munengon.
tenah _______________ 59_________________ isma tantawi
Engon komi lemule capancaturku,
Nge pait lagu ungke rimang.
Engon komi lemule caliteraku,
Nge jaing lagu lede ilang.
Kungeren kul-kul i belang kampong,
Kubetihmi le kire atur resam peraturen.
Kungeren kul-kul i wasni berawang,
Kubetihmi lekire aih si misi beye-e.
Kungeren kul-kul i was uten,
Kubetihmi le kire tamas si misi kule-e,
Kungeren kul-kul atasni pematang,
Kubetihmi le kire uyem si musesarne.
Singuk kukeberen,
Ruesku naru-naru i bibir lebih,
Tubuhku kul-kul i mata sirungni saudere.
Gaib ari ama jarak ari ine,
Ike gerahan musangka ngenali telege,
Ike mulape musangka ngenali ralikni gelime,
Bese peh capancaturku enti enye jauh pikirmu,
Besepeh caliteraku enti renye jarak rasamu.
Maklum sejebes lemule ruesmu,
Ike tubuhku cempedak cenung ku peger,
Gere ilen pane male belejer.
Ike ruesku cempedak cenung ku kite,
Aku kekanak gere ilen pane.
Oyale kati-e kutiro manat putenah,
Urum ejer marah ari ruesmu.
Buge-buge merkeku mendepeten lisik,
Buge-buge pekakku mendepeten cerdik.
tenah _________________ 60 _____________ isma tantawi
CAPAN CATUR TERA SEBERCALITERA ……………………
Adi : Mera kedie ijo..o,
Seme si kutomang.
Mera kedie senang,
Karuni ateku.
……………………………………
Besepeh capancaturku,
Besepeh caliteraku,
Enti enye jauh pikirmu,
Enti enye jarak rasamu.
Sikerna ruesku,
Nge gaib ari ama,
Nge jarak ari ine,
Arapeh ejer marah ari ine,
Nge mugerawal buh jangkungku si kolak.
Arapeh manat putenah ari ama,
Nge mutekar buh alihku si rantol.
Capan catur calitera,
Ingin si sara ingin ini,
Male ken jelente sara ama,
Male ken jelente sara ine.
Buge-buge sinte murip,
Kite bersikeberen.
Buge-buge sinte mate,
Kite bersientongan.
Ike sara kona porak,
Gelah roante merasa kemuhen.
Ike sara niri,
Gelah roante merasa sejuken.
tenah_______________61 _____________ isma tantawi
Capancaturte,
Gere male munanga-i langi.t
Caliterate,
Gere male munungku-i bumi.
Sentan mudemu urum ruesmu,
Lagu si atas dih langit kujujung,
Lagu si rata dih bumi ku jejak.
Ujungni didong,
Tengah melem bute…………!
A : …………………………
B : Pantak pantul dere geh kene kata-e.
Capan catur ari ruesmu,
Nge lagu gule muturusen.
Cali tera ari tubuhmu,
Nge lagu lue mubungkusen.
Utus dih tubuhmu bercalitera,
Utus dih ruesmu bercapancatur.
Ike lungi-e nge musangka,
Ku gule uring.
Ike lema-e nge munsangka,
Ku keramil pining.
Capancaturmu nge lagu aih wasni pingen,
Gere naeh mulingek ku kuen,
Gere naeh mulingang ku kiri.
Beranak nangkat ku belang mungkur,
Cerak bertakad peri berukur.
Ike capan catur caliteraku,
Gere naeh kutoho,
Enta si simulo,
Enta si sipuren.
tenah _________________ 62 _____________ isma tantawi
Ike ari ruesmu,
Lagu singe mujurah penan lemak lungi.
Ike ari beden tubuhku,
Enti mulo emas pirak,
Ulungni kayu simabuk paitpeh,
Gere terjurah naku,
Ku seni ni ruesmu.
Capancaturku,
Nge lagu utem bentor,
Selalu bojor-bojor.
Kati terdiri peh ku ruesku,
Ku atasni papan ini,
Gere ari cerdik paneku,
Gere ari gagah beraniku.
Pihak dak ge ara laen,
Utem bulet tuyuhni tereten.
Daripede seserengmu,
Lagu pempungen,
Gere muulung, gere mucabang.
Oyele Katie terjali rueku ku atasni papan ini.
Besepeh kenaku,
Enti enye jauh pikirmu,
Enti enye jarak rasamu.
Karena lo peh nge relem kurelem,
Jem peh nge lebih ku lebih,
Selangkan beralih rejeni denganne.
Besilo aih mupasir,
Kurik mutungir,
Umet berpikir.
Berpikirmi bang kite,
Ari ruesmu nge ara muroan,
Ari tubuhku nge ara entulun.
Ike kite kaji peh,
Laut lilin pulo perca.
Gih genap aihni laut ken tintae,
Gih genap rantingni kayu ken penae.
Ike naru peh tali roa we punce-e,
Ike dele peh peri sara we munge-e.
tenah _______________63____________isma tantawi
Adi : Ike kejang sana gere teduh,
Ke mentunuh sana gere nume.
Enti kase memadun nen buet,
Ta munupet ku jema si dile.
……………………………………………..
Besilo abang rejeku,
Ruesku peh nge terserah ku tubuhmu.
Ike kite mungen arup ini,
Tubuhku gere menungkah.
Ike kite mupakat peh,
Ruesku gere mudewe.
Sara ruesmu ku remalan temule,
Tubuhku nunung terpuren,
Atau ruesku termulo,
Tubuhmu terpuren.
Sara tebang berbeles,
Mate berbela.
Oya peh gere kutungkah,
Aku gere male ngenali tungkah,
Tubuhku gere male ngenali dewe.
Buge musampe we sara ama,
Buge musampe we sara ine.
Sara jelen ukum.
Ke keneko
Atau pun jelen edet
Emeh ne terserah ku tubuhmu
Adi: Renah kupi renah kupi renah,
Renah kupi mude.
Awin gihmu selpak kupi renah,
Jangko gih muleno.
tenah _________________ 64 _____________ isma tantawi
Si kerna didongte
Gere male bertalu menang
Gere male bertalu royo
Menang gere male ken lebe
Royo gere male ken rugi
Ujungni didong
Berkebermi renye…………
tenah _____________65__________________isma tantawi
Pemungen
Laut mupingir
Aih mupasir
Umet berpikir
Atu nge seger bilang
Aih nge seger suket
Tanoh nge seger timang
Arani uken
Karena ara toa
Arani bur
Karena ara paluh
Arani atas
Karena ara tuyuh
Arani berakah
Karena ara sunguh
Ike narupeh tali
Roa we punce-e
Ike naru peh peri
Sara we munge-e
tenah _______________66____________isma tantawi
Ike ikaji peh laut lilin pulo perca
Gih genap aihni laut ken tintae
Gih genap rantingni kayu ken pena
Ulakmi bang kite
Enti lagu pudahna
Gere lagu besilo
tenah __________________67_____________ isma tantawi
BIODATA
Drs. Isma Tantawi, M.A.
Lahir Pada Tanggal 07 Pebruari 1960
Di Kampung Mangang, Rikit Gaib
Kabupaten Gayo Lues Provinsi Aceh Leuser Antara, Indonesia
Tel: (061) 8225019 HP: 08126543562
E-mail: cicempala @ yahoo.com
Pendidikan
- SD Negeri Mangang, tahun 1973
- SMP Negeri Blangkejeren, tahun 1977
- SMA Negeri Kutacane, tahun 1980
- Sarjana Sastra USU, tahun 1985
- Masters of Art Universiti Sains Malaysia, tahun 2006
- Mahasiswa (S3) Universiti Sain Malaysia 2006
Pengalaman Pekerjaan
- Kepala SMA Dwitunggal Medan (1988-1990)
- Kepala SMA Berdikari Medan (1990-1991)
- Kepala STM Medan Area Medan (1991-2008)
- Kepala SMA Mayjend Sutoyo Medan (1994-2005)
- Kepala STM Mayjend Sutoyo Medan (1994-2005)
- Kepala SMP Mayjend Sutoyo Medan (2001-2005)
- Dosen Universitas Darmawangsa (2002-2008)
- Dosen Tamu Kolej Sentral Kuala Lumpur (2005-2008)
- Dosen Tetap Fakultas Sastra USU (1986-2008)
Hasil Karya ( Berkaitan dengan Gayo)
- Harapan dan Kenyataan Organisasi Gayo, Naskah Seminar, 1992
- Kumpulan Puisi “ Gayoku Sayang “ , 1994
tenah _______________68 ____________isma tantawi
- Pincipta Syair Kaset “ Kalam Janyi ”, 2000
- Asal-usul dan Karakter Suku Gayo, Naskah Seminar, 2000
- Budaya Politik Kita, Naskah Seminar, 2000
- Didong Gayo Lues: Yang Terlupakan dari Kaki Gunung Leuser, Naskah Seminar Internasional 2005
- Adat Perkawinan Suku Gayo Lues, Naskah Seminar Nasional, 2005
- Didong Gayo Lues: Satu Analisis Pemikiran Masyarakat Gayo, 2006
- Didong: Analisis Keindahan Bahasa dan Fungsi Sosial, Jurnal Ilmiah “Logat”, 2006
- Buku Pilar-Pilar Kebudayaan Gayo Lues, Segera Beredar !
Senin, 25 Mei 2009
Langganan:
Posting Komentar (Atom)
puisinya bernyawa
BalasHapusMantap pdeh
BalasHapusKarya terbaik Gayo
BalasHapus