PIDATO TEPUNG TAWAR Bupati Aceh Tengah, Gayo Lues dan Bener Meriah di Asrama Haji Medan

Oleh: Drs. Isma Tantawi, M.A.


Assalamualikum…………..
Alhamdulillaahhilazi……...


Gere ilen ara langit
Gere ilen ara bumi
Gere ilen ara aras
Gere ilen ara kursi

Awal serule Asal Linge
Bertirun ku rembege
Berusihen ku singe munge

Kunulku nge tersesuk berdilem tajuk
Sesukku nge terdiri bertajuk renggali
Terjali tabi

Tabimi mulo langit………
Maafmi mulo bumi………

Semah Sujudku ku pengulunte
Bapak Bupati dan Wakil Bupati Kabupaten Aceh Tengah, Aceh Tenggara, Gayo Lues, dan Bener Meriah beserta Ibu

Salam Semah
Bapak Ketua DPRD Aceh Tengah, Aceh Tenggara, Gayo Lues, dan Bener Meriah beserta Ibu

Serta
Bapak Ketua MPU beserta Ibu
Bapak Sekda beserta Ibu
Bapak Dandim berserta Ibu
Bapak Kapolres beserta Ibu
Bapak Kejaksaan berserta Ibu
Bapak Kehakiman beserta Ibu
Bapak-bapak kepala Dinas beserta rombongan
Bapak dan Ibu Keluarga Gayo Sumatera Utara
(KGSU)
Sibeberu singe rempak susun
Sibebujang singe susun pedi
Dan Hadirin yang berbahagia

Salam semah ku ama urum ine
Ralik juelen, sebet guru
Kaum biak ni ama
Kuluh rege ni ine
Ari uken urum toa
Ari bur urum paluh
Siara i atas ni batang ruang ini
Si ara i atas ni gergel tete ini

Ike sawah ku tauk ku tauki……..
Ike gere sawah kutauk……..
Kutatangan jejariklu sisepuluh…………
Empitun ku atas pintun ku …………
Kuayunen empitun ku kuen………
Ken ganti ni batil tembege………

Asal mule-e cico ni manuk…….
Cico ni manuk selangkan terang……
Nge sawah waktu nge tenes ketike
Nge genap sarat nge tumung pakat

Nge ara ijin ari Tuhen
Nge ara sepaat ari Nabi
Kite nge musampe sara ama
Kite nge musemperne sara ine

Kabupaten Aceh Tengah ken si silubere
Gayo Lues ken si Lah
Kabupaten Bener Meriah Ken si Bangsu

Salam Ari kami
Seluruh Masyarakat Keluraga Gayo Sumatera Utara (KGSU)
Mengucapkan selamat
Kepada Bapak Bupati dan Wakil Bupati Kabupaten Aceh Tengah, Aceh Tenggara, Gayo Lues, dan Bener Meriah
Semoga Sukses Untuk Membangun
Dataran Tinggi Gayo

Ama ine dengan sudereku

Kite manusie sebagai hamba Allah
Kite Umet ni nabi Muhammad SAW
Kami ari Keluarga Gayo Sumatera Utara
Menyambut kemnenangan Seluruh Rakyat Dataran Tinggi Gayo
Dengan acara tepung tawar, tujuannya:

Pertama:
Sebagai rasa syukur kepada Allah SWT yang telah menurunkan berkah dan rahmad-Nya ke Dataran Tinggi Gayo.

Kedua:
Untuk meningkatkan persatuam dan kesatuan antara sesama orang Gayo dan diharapkan Gayo menjadi satu di seluruh dunia

Ketiga:
Untuk bersilaturrahmi antara Pemerintah Daerah Kabupaten Aceh Tengah, Aceh Tenggara, Gayo Lues, dan Bener Meriah dengan masyarakat Kelurga Gayo Sumatera Utara

Keempat:
Untuk melestarikan Budaya Gayo, khususnya tepung tawar.

Kelima:

Untuk berbagi informasi antara sesama kita, demi untuk membangun Dataran Tinggi Gayo secara keseluruhan.

Salam semahku

Teniron ni roh urum teniron tubuh
Ume koro si naru tanuk-e
Ume ume si kolak tempeh-e
Ume berawang simubeye-e
Ume Uten simukule-e

Teniron ni kami
Reje we kire siadile
Rakyat we simakmure
Urang Gayo we sibersatue

Daling kolakmu male kami serei
Cabang gedokmu male kami juntei
Ulung rebungmu male kami longohi

Inih kire si beredenne
Ceding kire simumatae
Tunes kire kire simupucukke
Peri kire si berabunne


Kati ku atas nguk tudung
Ike ku tuyuh nguk ken tungkelen
Gelep nguk ken suluh
Uren nguk ken payung

Dele ilen uten gere mukule
Dele ilen berawang gere mubeye
Dele ilen ama atas ni rering tepas
Dele ilen ine tuyuhni supu serule

Mari oya peh we minyen
Kami sawahan teniron empu ni tempat
Ari Dataran Tinggi Gayo
Tenironni itik kul kire aih
Tenironni kedih muah kire kayu
Tenironni koro enti naeh ara siut urum telong
Tenironni manuk enti ara bedil urum senapan
Tenironni iken enti ara naeh racun, bum, urum strum
Teniron ni depik urum gegaring
Enti naeh ara illegal fishing
Teniron ni akang urum noang
Enti naeh ara illegal hunting
Teniron kedih urum imo
Enti naeh ara illegal loging

Ama ine dengan sudere bewenne rata

Kati musampe kite sara ama
Kati musemperne kite sara ine
Kati sara sakit bewente bisen
Kati sara nuing bewente mangan manisen

Nge kukire ku jejariku si sepuluh
Nge kubilang ku rerangku siwaluh
Nge kutangaki ku atas
Nge kutungkui ku tuyuh
Nge kutulak urum kayu cabang
Nge kuikot urum tali naru
Nge kurampat urum purih pitu
Nge kubaca kiteb
Nge ku uke buku

Kite turah murum sara ama
Kite turah murum sara ine


Kunulte turah sara duk
Ratipte turah sara anguk
Nyawate turah sara peluk

Sinte murip kite bersikeberen
Sinte mate kite bersientongen
Kati nguk Gayo mulawi
Kati nguk Gayo muhehe
Kati enti Gayo ken penengkip
Kati enti Gayo ken penggenap
Gayo oyale Gayo (kata ceh kucak Kabri Wali)

Ama Ine dengan sudere

Ike berawang
Misi iken urum beye
Urum-urum kite tengkam ikenne
Urum-urum kite biyon beye-e

Ike uten
Misi akang urum kule
Urum-urrum kite karo akangnge-e
Urum-urum kite usir kule-e

Ama ine dengan sudere
Ku bur kite urum-urum nangkok
Ku paluh kite urum-urum ngilih
(Oyale Manat Putenah ni Bapak Bupati Gayo Lues)
Oya gere naeh tertungkah
Oya gere naeh terdewe

Kati semperne Gayo sara ama
Kati musampe Gayo sara ine

Murip kite turah ikanung edet
Mate kite turah ikanung ukum
Adet ari kute merhum
Ukum ari Syiah Kuala

Inget atur resam peraturen
Inget ari siopat
Atur ari sipitu
Resam ari siempat belas
Peraturen ari reje


Oya nge jelas wasni edet
Nge terang was ni ukum

Ari sara tingket kusara tenge
Kite serke bang Dewal Opat
Dewal opat opat persegi
Oyale ken ton tempatte
Isiepeh keta jema opat
Buetepeh keta sarak opat
Sudere, urang tue, pegawe, pengulunte

Sudere : Pong mupakat…..
Orangtue : Musidik sasat……
Pegawe : Simetih sah batal….
Pengulunte : Musuket sifet…..


Kemuduk kemudien daripede oyapeh
Terringet beden tubuhku ken Biak Opat
Ralik, juelen, sebet guru
Oyapehwe terrang jelas gelis selese

Ralik : Mangan penjamu….
Julen : Kiding pantas tulen teger…..
Sebet : Ramah-ramah….
Guru : Tempat ni oros senare….

Oya bewenne rata
Kite nge rempak susun
Wanni Ruang Sitige
Pendehren, pendahrin, kekasihen

Pendehren : Tempat ni cawan pingen
Pendahrin : Tempat ni jamu urum sukut
sepangkalan, ike mukulit….
Kekasihen : Kekasihen oyale istana nireje…..



Semah sujudku
Akhire kusawahan
Ike iwasni belang kite tunung bekas
Ike iwasni uten rime kite tunung lewas
Enti naeh kite lale
Kolakan eye langkah
Narun eye jangkang
Kite susunmi bang belo
Kati enti surang saring
Kite bacaran bang pora
Kati enti kite taring
Engon enye langkah
Tetah enye ketike
Urum-urum kite berkekede
Tir kite uwet
Lanih kite nume
Kati dele enguk kite rike

Ama ine dengan sudereku:

Ini kusawahan ari ate putihku
Ini kutenesen Ari telege jernihku

Ume kerna jais
Ume kerna Bies
Ume kerna sumpah
Ume kerna kelsih

Ike ari beden tubuhku
Enti mulo emas pirak kupang busuk
Penan si lemak lungi
Ulung ni kayu simabuk pait peh gere terjurahan

Si ara tauk akul urum sepak ketukah
Munge gih munge sawah gih sawah
Urum capan catur nge pait lagu ungke rimang
Calitera nge jaing lagu lede ilang

Salam Semahku

Aih mupasir Kurik mutungir
Umet berpikir
Berfikirmi bang kite
Ike naru peh tali roa we punce-e
Ike dele peh peri sara we munge-e

Ike kite kaji peh laut lilin pulo perca
Gih genap aih ni laut ken tinta
Gih genap ranting ni kayu ken pena
Kadang ara capan catur caliteraku
Padok gih panal kelabu gih perseh


Ike ara capan caturku
Jeroh ipenge kemiring
Oya asale ari Tuhen urum Tuen Guruku
Ike ara caliterku gere remang ipanang mata
Oya asale ari beden tubuhku

Maklum seje bes le mule
Ruesku naru-naru i bibir lebih
Kul-kul i mata sirung
Ike gerahan musangaka ku telege
Ike mulape musangka ku ralik ni gelime
Buet ni delah gere bertulen
Buetni ipon gere berbelide
Dang-dang ara sempat we gere
Dang-dang oye sempatwe nume
Ejer marah ari ama nge mutekar buh alihku sirantol
Manat putenah ari ine nge mugerawal buh jangkangku sikolak

Ijien terang ni reje, ama ine, dengan sudere
We sikutangisi

Kadang oya peh gere musampe
So meja ijo kantur putih ken ton tempate
Ike ukum mutentu kahe taunne
Ike dene mutentu kahe ribue

Ike salah kahe ku edet aku berdolat
Ike salah ku ukum aku bertobat
Akhire seluruh sumbangsih ni ama ine
Serta Sukut sepangkalan
Singe berkjang payah
Iwas ni sinte ini
Kuucepen terime kasih
Semoga Tuhan memberkahi. Amin!
Lebih dan kurang saya mohon maaf
As………….